Besti hollustuísinn
Ninja Cremi: Besti hollustuísinn og leynitrix.
Hér skiptir áferðin öllu máli! Ég geri yfirleitt tvöfaldan skammt og drekk helminginn sem sjeik í morgunmat, set rest í frysti í Ninja Cremi box og geri svo ís daginn eftir með vélinni og borða hann í morgunmat með granóla og hnetusmjöri.
Innihaldsefni
2 stórir frosnir bananar (vel þroskaðir en ekki brúnir)
250 ml hnetumjólk án vibætts sykurs (heslihnetumjólk er best, annars möndlu- eða hefðbundin)
2 döðlur
1 msk hnetusmjör
30 gr vanilluprótein - má sleppa (lesa utan á og forðast sykur og aukaefni)
2-3 vænir klakar (má sleppa ef ekki er verið að gera sjeik)
Aðferð
Setjið öll hráefni í góðan blandara og blandið uns kekkjalaust og kremað.
Hellið í eitt glas og eitt eða tvö Ninja Cremi box og frystið. Þar sem blandan var að hluta frosin er yfirleitt nóg að frysta í 5-6 tíma en ekki sólarhring eins og leiðbeiningar vélarinnar segja til um.
Þegar blandan er orðin gaddfreðin eru þetta töfra ráðin til að tryggja fullkomna útkomu:
Fyrir þolinmóð er best að kippa boxinu út og láta það standa á borði í 5-10 mín og smella svo í vélina.
Fyrir hin:
1. Setja hliðarnar á boxinu undir rennandi heitt vatn í nokkrar sekúndur. Það hjálpar vélinni að ná samfellu í mjúkri áferð og losna við ísnálar.
2. Setja boxið í vélina og stilla á soft serve.
3. Taka boxið út og setja hliðarnar aftur örstutt undir heitt vatn.
4. Ýta á re-spin.
Ef ísinn er "krullaður" eða eins og harðar flögur eftir fyrstu þeytingu má bregða á það ráð að setja 1 msk af mjólk út í og svo setja heitt vatn á hliðarnar örstutt áður en ýtt er á re-spin.